今晚睇IG見到二汶翻唱TWINS 嘅下一站天后，有人話二汶係救左首歌，但另一邊箱，有人話下一站天后，係要搵返當年嘅TWINS 唱先唱到個份少女味道 (然後我click 一click wiki,原來TWINS 今年係出道19 年) …… 我即刻諗起幾日前，我有個大同喺whatsapp share 左張「當年今日」嘅相，然後佢話：我地咁多年個樣都冇咩變呀，大家keep 得好好，hahahahahaha
我好記得大約10年前，我喺銅鑼灣SOGO 外牆見到TWINS 呢張出道10年嘅poster(就係呢張，你一睇就知上定下邊張係before 定after) ，我同一個朋友經過，我話: wa，真係好大分別呀..... 朋友話: 係，唔係個樣，係個氣息眼神同感覺...
其實我係想話，就算一個keep 得幾好嘅美魔女，任佢花幾多工夫同銀紙，日日拉皮都好，一個人老左，個份感覺同氣息係返唔到轉頭。TWINS 可能過左20 年，冇咩巢皮，扮學生唔算太有違和感，加返D 批盪就唔覺，但有時老唔係因為條紋，係因為你嘅experiencce....
一個人大左，有左經歷，就冇左個份「乜都夠膽死」嘅勇氣，會考慮機會成本，事事諗做唔做得過嘅猶豫，有啲社會真相同道理，就好似踩單車咁，你識左，就冇可能彈返轉頭變唔識。所以我最想要嘅化妝品同護膚品，唔係個D 乜乜77去紋去巢去斑功效，我最想係有個護膚品搓吓個心靈，可以reset 返，有返未出來打工個份心態，對個社會有希望，同時覺得自己有能力改會個社會，或者最少唔好俾個社會改變左我.....
我睇返大同send 出來張相，我冇左後生個「氣息」喇，我啲大同都冇左喇。但，我唔覺得特別傷心，正如我所講，你冇左個份後生氣息，係因為你有左經歷，如果你嘅經歷有喜又有悲，你條魚尾紋係笑出來唔係憂出來，係值得慶賀。
呢排有D fresh grad 朋友表示人生冇希望，前路茫茫，話自己連interview 機會都冇，唔知做乜好，睇見佢地，覺得佢地有急速衰老嘅氣息，明明「未成長已經老去」，未投入社會，已經對社會絕望。大家唔好咁啦，你冇野做，喺屋企思考人生可能成為出色嘅哲學家呢。
每日每人都有24個鐘，有D 人話後生個24 個鐘係珍貴過老人家嘅24個鐘，因為後生嘅時間好短，所以如果有救命神藥，應該先俾後生仔，但我反而覺得老人家嘅24 個鐘係比後生嘅24 個鐘珍貴，因為愈接近死亡，時間愈少，以經濟嘅角度，supply 愈少，price 應該愈高。咁既然時間係愈來愈珍貴，好好利用好好珍惜，希望大家老左嘅時候，臨死個陣，冇後悔「早知我武漢肺炎個陣唔好日日訓咁多，如果個陣訓個D 時間可以好似saving account D 錢咁做定期，老左先使，可以好好enjoy life」
PS. 我都覺得當年嘅TWINS 唱下一站天后先唱到個神緒，二汶唱出嚟嘅係技巧，TWINS 唱出來嚟嘅係回憶，咁我已經冇左份氣息，當然想聽返份回憶啦。
Search